Die pad tot hier

As blinkoog jong sjef was ek bevoorreg om by die inspirerende Topsi Venter te leer kook. Sy het lank voor vandag se sjefs al ge-“forage” en die fynere kunsies van Suid-Afrikaanse cuisine onder die knie gehad. Haar kennis oor die vermenging van kruie en speserye is verstommend en dis ook sy wat my aan die wonderwêreld van Leipoldt, Tulleken en tante Alie Hewitt bekendgestel het. Dit is te danke aan Topsi dat die saadjie om ons kosgeskiedenis na te vors so vroeg reeds in my loopbaan geplant is.
Hetta van Deventer-Terblanche

Nadat ek as professionele sjef gekwalifiseer het, het my paadjie ‘n hele paar interessante draaie geloop. In die spysenieringsbedryf was dit my passie om “nuwe” tradisionele resepte te ontwikkel. Mettertyd het dit na die natuurlike stap gevoel om my liefde vir kosmaak met my geskiedenisbelangstelling te kombineer. Spoedig het ek ontdek dat ‘n groot deel van ons tradisionele repertoire al (amper) vergete was. Dit het my geïnspireer om iets daaraan te doen.

My gunsteling kos

Ek is mal oor rooivleis. Ek is lief vir botter. Daar is geen room soos volroom. Wyn wyn wyn. Ek geniet vars, heilsame, tradisionele kos. Alles proe beter wanneer mens dit deel. My knieë word lam vir alles wat my man kook (behalwe natuurlik die geposjeerde, gekrummelde, diepgebraaide eier episode, maar ons praat nie daaroor nie…).

Ander sensoriese plesiertjies

Van kleintyd af het die speserykabinet met sy menige aromas my heeltemal betower. Natuurlike rate wat so tussen resepte in ou, handgeskrewe kookboeke neergeskribbel is maak my nuuskierig. En ek het ‘n intense belangstelling in die parfuumnotas van verskillende kosse.

Maar genoeg oor my

Vertel my gerus ‘n bietjie meer oor jouself en voel vry om enige tradisionele resepte, historiese kosfeite en staaltjies oor Afrika-aromas hier te deel.